პოლონეთში, გდანსკის ტექნიკურ უნივერსიტეტში, მიმდინარე წლის 20 აპრილს, ევროპის უნივერსიტეტების ასოციაციის 2023 წლის გენერალური ასამბლეა და გაერთიანებული კონფერენცია გაიმართა. მასშტაბურ ღონისძიებებზე, რომელსაც EUA-ს წევრები ესწრებოდნენ, მიწვეული იყო საქართველოს რექტორთა მუდმივმოქმედი კონფერენეციის თავმჯდომარე, პროფესორი დავით გურგენიძე. გენერალურ ასამბლეასა და კონფერენციაზე საქართველოს რექტორთა მუდმივმოქმედი კონფერენეციის სახელით მონაწილეობის მისაღებად, კონფერენციის თავმჯდომარემ, პროფესორმა დავით გურგენიძემ წარმომადგენელი - ქალბატონი ნინო ტალიაშვილი მიავლინა.  გდანსკის ტექნიკურ უნივერსიტეტში შედგა ევროპის უნივერსიტეტების ასოციაციის ახალი პრეზიდენტისა და საბჭოს წევრების არჩევნები, რომელშიც 500-ზე მეტი ევროპული უნივერსიტეტის რექტორი და პრეზიდენტი მონაწილეობდა. ასოციაციის ახალ პრეზიდენტად ჟოზეფ გარელი აირჩიეს. ცნობისათვის, საქართველოს რექტორთა მუდმივმოქმედი კონფერენცია აქტიურ კოლაბორაციაშია EUA-თან, რომელთანაც თანამშრომლობს უმაღლესი განათლების პოლიტიკისა და პრაქტიკის შესწავლის, ხარისხის უზრუნველყოფის, ინტერნაციონალიზაციის, ტრანსნაციონალური და ინსტიტუციური განვითარების პროექტების მიმართულებით. ევროპის უნივერსიტეტების ასოციაცია (EUA) ერთ-ერთი ყველაზე ფართომასშტაბიანი ორგანიზაციაა, რომელიც ბრიუსელშია დაფუძნებული და ევროპის უნივერსიტეტებსა და განათლების სფეროში მოქმედ ორგანიზაციებს აერთიანებს.