ქუთაისის საერთაშორისო უნივერსიტეტის მენეჯმენტის სკოლის ინიციატივითა და ორგანიზებით, KIU-ში პოდკასტის ჩემპიონატი“ (PODCAST Competition Fall 2024) ჩატარდა. აღნიშნული ჩემპიონატი ერთ-ერთი ყველაზე მოთხოვნადი და პოპულარული ღონისძიებაა უნივერსიტეტის მასშტაბით. პროექტის მიზანია სტუდენტებში ისეთი უნარების განვითარების ხელშეწყობა, როგორებიცაა: იდეების ფორმირება, კომუნიკაცია, პრეზენტაციის მომზადება და წარდგენა, ლოგიკური აზროვნება, თეორიისა და პრაქტიკის ინტეგრირებით დასკვნების გაკეთება. 

მე-4 სეზონის ჩემპიონატში მენეჯმენტის საბაკალავრო პროგრამის 9 სტუდენტი/მომხსენებელი მონაწილეობდა. თითოეული მათგანი ჟიურის წინაშე საინტერესო თემით წარდგა. ჟიურის წევრები ქუთაისის საერთაშორისო უნივერსიტეტის აკადემიური და ადმინისტრაციული პერსონალის  წარმომადგენლები იყვნენ. სტუმრის სტატუსით, მოწვეული გახლდათ ჟურნალისტი და მსახიობი დათო ლიკლიკაძე.

PODCAST Competition Fall 2024-ის ჩემპიონატს სამი გამარჯვებული ჰყავს. პირველ ადგილზე ლაშა გიორგი ცინცაძე გავიდა, მეორე ადგილი ლუკა ცარციძემ დაიკავა, მესამე ადგილი კი არჩილ თოდუას ერგო, ლაშა გიორგი ცინცაძე ასევე დასახელდა სტუდენტების რჩეულად.  პროექტის ყველა მონაწილე რამდენიმე კვირის განმავლობაში ინტენსიურად მუშაობდა აუდიტორიის წინაშე წარსადგენად. მათ მიერ მომზადებული თემები მრავალფეროვანი იყო. ლაშა გიორგი ცინცაძის პოდკასტი “ედელვაისი” გახლდათ, ლუკა ცარციძის - “A bite on the world”, ხოლო არჩილ თოდუას -  “თოჯინები იცინიან”.

პროექტის წარმატებით განხორციელების მიზნით, შექმნილი იყო სტუდენტთა საორგანიზაციო და მენტორთა ჯგუფები.  საორგანიზაციო ჯგუფი მუშაობდა ღონისძიების ადმინისტრაციულ, ლოგისტიკურ, ორგანიზაციულ საკითხებზე, ხოლო მენტორთა ჯგუფი ეხმარებოდა პოდკასტის სპიკერებს მოხსენებების (pitches) მომზადებასა და წარდგენაში.

პოდკასტის ჩემპიონატის ანალოგები მრავლად არსებობს მსოფლიოს სხვადასხვა ქვეყანაში და წარმოადგენს ერთ-ერთ საუკეთესო პრაქტიკას, მომხსენებელმა ფართო საზოგადოებას გაუზიაროს პირადი, პროფესიული, ბიზნეს საქმიანობით მიღებული გამოცდილება, დასკვნები და, ამით, დაეხმაროს და მხარი დაუჭიროს სხვა ადამიანების მისწრაფებებს.