საქართველოს ტექნიკური უნივერსიტეტის რექტორმა, აკადემიკოსმა დავით გურგენიძემ და ფრანგულ-ქართული უნივერსიტეტის წარმომადგენელმა, საფრანგეთის უნივერსიტეტ რენ 1-ის პროფესორმა აჰმედ ზუარმა, სტუ-ის აგრარული მეცნიერებებისა და ბიოსისტემების ინჟინერინგის ფაკულტეტის აგრო-სასურსათო ტექნოლოგიის ქართულ-ფრანგული ორდიპლომიანი საბაკალავრო პროგრამის 2023-2024 სასწავლო წლის კურსდამთავრებულებს ორი - საქართველოს ტექნიკური უნივერსიტეტისა და საფრანგეთის უნივერსიტეტ რენ 1-ის (l’Université de Rennes 1) დიპლომები გადასცეს. 

კურსდამთავრებულთათვის ქართული და ფრანგული უნივერსიტეტების დიპლომების გადაცემის ცერემონიას, რომელიც საქართველოს ტექნიკურ უნივერსიტეტში გაიმართა, ესწრებოდნენ უნივერსიტეტის სამეთვალყურეო საბჭოს პრეზიდენტი, პროფესორი ზურაბ გუდავაძე, კანცლერი, პროფესორი კარლო კოპალიანი, ვიცე-რექტორები თამარ წერეთელი და თამარ ლომინაძე, აგრარული მეცნიერებებისა და ბიოსისტემების ინჟინერინგის ფაკულტეტის დეკანი, აკადემიკოსი ედიშერ კვესიტაძე, ფაკულტეტის პროფესორ-მასწავლებლები, სტუდენტები, ასევე, ფრანგულ-ქართული უნივერსიტეტის, უნივერსიტეტ რენ 1-ის და სტუ-ის ადმინისტრაციის წარმომადგენლები.



რექტორმა დავით გურგენიძემ და პროფესორმა აჰმედ ზუარმა საქართველოს ტექნიკური უნივერისტეტის ქართულ-ფრანგული ორდიპლომიანი საბაკალავრო პროგრამის სტუდენტებს: ნუცა ჭიკაძეს, თამარ ზედგინიძეს, გარეგინ კირაკოსიანს, სალომე მიქაძეს, ნინო გაგელიძეს, ნინო ლუარსაბიშვილს, გიორგი ყეინაშვილს, ლიზი პაპაშვილს, ცოტნე ქიტუაშვილს, მილენა მალხასიანს, ნოდარ დალაქიშვილს, თინათინ ფოცხვერიასა და ლაშა ჯანგველაძეს პროგრამის წარმატებით დასრულება მიულოცეს და ქართულ-ფრანგული დიპლომები საზეიმო ვითარებაში გადასცეს.
 
საქართველოს ტექნიკური უნივერსიტეტის რექტორის, აკადემიკოს დავით გურგენიძის განცხადებით, ქართული და ფრანგული უნივერსიტეტების დიპლომები, სასურსათო ტექნოლოგიის ერთობლივი საბაკალავრო პროგრამის ფარგლებში, სტუ-ის კურსდამთავრებულთა რიგით მეოთხე გამოშვებამ მოიპოვა.

„საქართველოს ტექნიკურ უნივერსიტეტსა და საფრანგეთის უნივერსიტეტ რენ 1-ს შორის თანამშრომლობა ეტაპობრივად ფართოვდება. ჩვენ რამდენიმეწლიანი ნაყოფიერი პარტნიორობა გვაკავშირებს ფრანგულ-ქართულ უნივერსიტეტთან, რომელიც საქართველოს განათლების, მეცნიერებისა და ახალგაზრდობის სამინისტროსა და საქართველოში საფრანგეთის საელჩოს მრავალმხრივი მხარდაჭერით დაარსდა. ერთობლივი საგანმანათლებლო პროექტის ფარგლებში, საქართველოს ტექნიკური უნივერსიტეტი კოორდინაციას უწევს სასურსათო ტექნოლოგიების საბაკალავრო და მეღვინეობა-მევენახეობის სამაგისტრო ორდიპლომიანი პროგრამების განხორციელებას. სასიხარულოა, რომ ჩვენი უნივერსიტეტის სასურსათო ტექნოლოგიების პროგრამის ბაკალავრთა უკვე მეოთხე გამოშვებამ მოიპოვა ერთდროულად ორი - საქართველოს ტექნიკური უნივერსიტეტისა და საფრანგეთის უნივერსიტეტ რენ 1-ის დიპლომები, რაც სტუდენტებისა და მათი პედაგოგების დიდი შრომის შედეგია. აღსანიშნავია, რომ პროგრამის ფარგლებში, ექვსმა წარმატებულმა სტუდენტმა სტაჟირების სრული კურსი საფრანგეთში გაიარა.

მადლობას ვუხდით საქართველოს მთავრობას, განათლების, მეცნიერებისა და ახალგაზრდობის სამინისტროს, პირადად მინისტრ ალექსანდრე წულაძეს, საქართველოში საფრანგეთის საელჩოს, ფრანგულ-ქართულ უნივერსიტეტსა და უნივერსიტეტ რენ 1-ს - საგანმანათლებლო პროცესის ორმხრივად მხარდაჭერისთვის. ვულოცავ ჩვენს ბაკალავრებს ამ მნიშვნელოვან წარმატებას! დარწმუნებული ვართ, ისინი სწავლას მაგისტრატურაშიც შემართებით გააგრძელებენ და შეძენილ ცოდნას, პროფესიონალიზმს ქვეყნის განვითარებას მოახმარენ“, - აღნიშნა რექტორმა, აკადემიკოსმა დავით გურგენიძემ.

სტუდენტებს ქართულ-ფრანგული პროგრამის წარმატებით დასრულება მიულოცეს ვიცე-რექტორებმა თამარ წერეთელმა და თამარ ლომინაძემ, სტუ-ის აგრარული მეცნიერებებისა და ბიოსისტემების ინჟინერინგის ფაკულტეტის დეკანმა, აკადემიკოსმა ედიშერ კვესიტაძემ, უნივერსიტეტ რენ 1-ის წარმომადგენლებმა და პროფესორ-მასწავლებლებმა. 

საქართველოს განათლების, მეცნიერებისა და ახალგაზრდობის სამინისტროსა და საქართველოში საფრანგეთის საელჩოს მხარდაჭერით, ფრანგულ-ქართული უნივერსიტეტის ფარგლებში, საქართველოს ტექნიკურ უნივერსიტეტში, აგრარული მეცნიერებებისა და ბიოსისტემების ინჟინერინგის ფაკულტეტზე, 2020-2021 სასწავლო წლიდან ამოქმედდა ერთობლივი, ქართულ-ფრანგული ორდიპლომიანი საბაკალავრო პროგრამა - „სასურსათო ტექნოლოგიები“, რომელიც ასევე მოიცავს საფრანგეთის უნივერსიტეტ რენ 1-ის 60-კრედიტიან მოდულს - „წარმოების მართვა რძის ინდუსტრიაში“, ერთობლივ პროგრამაზე სწავლება ინგლისურ ენაზე მიმდინარეობს.

სასწავლო პროცესში ჩართულნი არიან ფრანგი პროფესორები და ექსპერტები, რომლებიც ქართველ სტუდენტებს თეორიულ და პრაქტიკულ გამოცდილებას უზიარებენ. პროგრამის ფარგლებში სტუდენტები 4-თვიან სტაჟირებას გადიან რძის პროდუქტების მწარმოებელ კომპანიებში - საფრანგეთსა და საქართველოში. სტუდენტთა დასკვნით შეფასებას, ფრანგული მხარის მონაწილეობით, სპეციალური ჟიური იძლევა.